ជាការពិតណាស់ បញ្ហាប្រឈមជាធំរបស់អ្នកប្រើបាស់ Smartphone គឺបញ្ហាអស់ថ្ម។ យើងពិតជាចង់បានទូរសព្ទដែលអាចប្រើបានពេញដោយសេរីពេញមួយថ្ងៃ (ការប្រើប្រាស់ខ្លាំងដូចជា លេងល្បែង ចាក់វីដេអូ ឆែកអ៊ីនធើណែត)។ ដោយមើលឃើញពីបញ្ហានេះ ខ្ញុំបាទសូមលើកយកពីវិធីខ្លះៗ ដើម្បីជួយសន្សំសំចៃថាមពលថ្មលើទូរសព្ទដែលដំណើរការលើប្រព័ន្ធប្រតិបត្តិការ Android ក៏ដូចជាប្រព័ន្ធប្រតិបត្តិការ iOS ( iphone...) ផងដែរ។ តោះ...! ដើម្បីកុំឲ្យខាតពេលយូរ សូមតាមដានទាំងអស់គ្នា។
វិធីសាស្ត្រងាយៗធ្វើឲ្យថ្មទូរសព្ទ Android ប្រើបានយូរ ៖
១.បន្ថយពន្លឺ (Brightness)៖ ជាទូទៅ ប្រមាណជា ៤០ ទៅ ៦០% នៃថាមពលថ្ម ត្រូវបានស៊ីដោយសារពន្លឺអេក្រង់។ ដំណោះស្រាយគឺចូលទៅ Settings > Display ដោយដក Tick ចេញពី Auto-Brightness ហើយកែតម្រូវពន្លឺឲ្យទាបតាមដែលយើងគិតថាអាចមើលបាន។
២.ផ្ទៃក្រោយ (Wallpaper)៖ ត្រូវដាក់រូបភាពនឹង ដោយមិនគួរដាក់រូបភាពមានចលនា (Live Wallpaper)។ ព្រោះរូបមានចលនាវានឹងប្រើ CPU & GPU ដើម្បីឲ្យរូបភាពអាចមានចលនាបាន។កាលណា GPU ដំណើរការ វានឹងទាញថាមពលពីថ្ម។
៣.រយៈពេលរលត់ពន្លឺ (Screen timeout)៖ ចូលទៅ Settings > Display ដោយដាក់ Screen timeout តែ ៣០ វិនាទី។
៤.ចលនា (Framework animation)៖ Framework animation គឺជាចលនានៅពេលដែលយើងបិទ បើកកម្មវិធី ចុច Home Menu ឬ Back។ ចលនានេះវានឹងប្រើ GPU ដើម្បីបង្កើតជាចលនាផ្សេងៗ ដែលជាហេតុនាំឲ្យវាស៊ីថ្ម។ ដើម្បីបិទវា សូមចូលទៅ Settings > Developer options ដោយអូសចុះក្រោម រួចបិទ Windows animation scale, Transition animation scale និង Animator duration scale។
៥.ធាតុក្រាហ្វិក (Widgets)៖ Widgets អាចជះឥទ្ធិពលដល់ថាមពលថ្ម ព្រោះវានឹងធ្វើការ Updates (ធ្វើឲ្យទាន់សម័យ) ខ្លួនឯងជាប្រចាំ។ ដូច្នេះសូមធ្វើការលុបចេញនូវ Widgets ទាំងឡាយដែលមាននៅលើ Home screen ដូចជា កម្មវិធីព្យាករណ៍អាកាសធាតុ កម្មវិធីវីឌីអូ កម្មវិធីព័ត៌មានដែលដំណើរការជាប់រហូត។ តែបើអ្នកចង់ទុក សូមកុំឲ្យវាធ្វើការ Updates (ធ្វើឲ្យទាន់សម័យ) ដោយខ្លួនឯង។
៦.Google Services ៖ Google Services មានដូចជា Gmail, Google Now, Maps និង Google+ ជាដើម។ កម្មវិធីទាំងនេះនឹងធ្វើការកំណត់ទីតាំងរបស់អ្នក នៅពេលដែលអ្នកភ្ជាប់ទៅកាន់ Internet (Wifi or Cell Network) ដោយប្រើ GPS ដែលជាហេតុនាំឲ្យ GPS ប្រើថាមពលថ្មដើម្បីបើក។ ដូច្នេះសូមចូលទៅ Settings > Location Settings ហើយបិទ GPS ចោល តែអ្នកអាចបើកវានៅពេលត្រូវការ។
៧.បិទ Auto-sync ៖ Auto-sync ប្រើសម្រាប់ធ្វើសមកាលទិន្នន័យរវាងទូរសព្ទ និងបណ្ដាញ (Cloud)។ ដូច្នេះសូមបិទវា ដោយចូលទៅ Settings > Accounts & sync ។
៨.មិនគួរប្រើ Task manager/Killer/Clean Master/Ram Booster ៖ យើងដឹងហើយថាអ៊ែនដ្រយ (Android) គឺអាស្រ័យលើលីនុចខឺណល (Linux Kernel)។ តាមគោលការណ៍គ្រប់គ្រងអង្គចងចាំ(Memory) របស់លីនុច " ការធ្វើឲ្យអង្គចងចាំទំនេរ គឺជាការខ្ជះខ្ជាយអង្គចងចាំ Free Memory Is a Waste Of Memory " ។ អង្គចងចាំមិនដែលទំនេរក្នុងប្រព័ន្ធប្រតិបត្តិការអ៊ែនដ្រយនោះឡើយ។ វាត្រូវបានចាក់បំពេញដោយ Cached Processes។ ពេលដែលយើងប្រើកម្មវិធីដូចជា Task manager, Killer, Clean Master, Ram Booster កម្មវិធីទាំងអស់នេះនឹងបញ្ឈប់ដំណើរការនៃកម្មវិធីផ្សេងៗទៀតដោយបង្ខំ ដែលផ្ទុយពីគោលការណ៍គ្រប់គ្រងអង្គចងចាំរបស់អ៊ែនដ្រយ។ ប្រហែល ២ ទៅ ៣ វិនាទីដំបូងនៃការសម្អាតរបស់កម្មវិធីទាំងនោះ ទូរសព្ទយើងនឹងដំណើរការរលូន។ ប៉ុន្តែ ២ ទៅ ៣ វិនាទីក្រោយមកអ៊ែននឹងចាក់បំពេញអង្គចងចាំជាមួយនឹង Cached Processes។ *កត្តានេះហើយដែលនាំឲ្យ CPU ធ្វើការច្រើន ជាហេតុដែលនាំឲ្យវាស៊ីថ្មដើម្បីដំណើរការ។ ដូច្នេះ សូមធ្វើការដកចេញ (Uninstall) ឬបិទ (Disable) នូវកម្មវិធី Task manager, Killer, Clean Master, Ram Booster ទាំងនោះចេញ។
៩.ប្រើ ART ជំនួស Dalvik ៖ ( វិធីនេះសម្រាប់តែ Android 4.4 Kitkat ឡើងទៅ) ART គឺជាពេលប្រតិបត្តិ (Runtime) ថ្មីមួយរបស់ Android 4.4 ជំនួសឲ្យ Dalvik ។ ART នឹងធ្វើការបើកប្រើជាមុន (Pre-compiles) នូវកម្មវិធីដែលបានដំឡើង ដើម្បីបើកវាឲ្យបានលឿនជាងមុន។ ART ប្រើ CPU ទាបដែលជាហេតុនាំឲ្យវាប្រើថាមពលថ្មតិច។ ដូច្នេះសូមធ្វើការប្ដូរពី Dalvik ទៅ ART ដោយចូលទៅ Settings > Developer options ហើយរើសយក ART ។
១០.កុំសម្អាតកម្មវិធីទើបប្រើ (Do NOT Clear Recent apps) ៖ អ្នកប្រើប្រាស់ Android ភាគច្រើនតែងតែចុចសង្កត់ (Hold HOME key) ដើម្បីសម្អាតកម្មវិធីទើបប្រើចេញពី RAM ។ ចំពោះ RAM មិនថាវាពេញឬទទេ គឺវាស៊ីបរិមាណអគ្គិសនីដូចគ្នា។ ពេលយើងចុចបើកកម្មវិធី CPU នឹងចម្លងទិន្នន័យពីឃ្លាំងផ្ទុក (Storage) ទៅដាក់ក្នុង RAM ដើម្បីបើកកម្មវិធីនោះ។ បើសិនកម្មវិធីនោះមាននៅក្នុង RAM រួចហើយ CPU នឹងមិនចម្លងទៀតទេ គឺវាប្រើផ្ទាល់តែម្ដង។ ដូច្នេះទុកកម្មវិធីដែលបានបើកឲ្យនៅក្នុង RAM ដដែលគឺបានជួយ CPU ។ ទូរសព្ទនឹងលឿន ហើយនឹងមិនត្រូវការអគ្គិសនីដើម្បីដំណើរការលើ CPU ។
១១.បិទ Auto-Rotate ៖ Auto-Rotate ប្រើ G-Sensor ដើម្បីដឹងថាអ្នកកាន់ទូរសព្ទផ្ដេក ឬបញ្ឈរ? បិទ Auto-Rotate មានន័យថាអ្នកកំពុងប្រើផ្នែករឹង (Hardware) តិច ដែលជាហេតុនាំឲ្យយើងប្រើថាមពលថ្មអស់តិចដែរ! សូមបិទវា ដោយចូលទៅ Settings > Display ហើយបិទ Auto-Rotate screen ។
១២.បិទដំណើរការ ឬលុបកម្មវិធីដែលមិនចាំបាច់ប្រើ។
១៣.កាត់បន្ថយការទាញយកអ៊ីមែល និងសារផ្សេងៗពី Server ( កុំទាញយកញឹកញាប់ពេក និងកុំទាញយកអ៊ីមែលចាស់ៗពេក )។
១៤.បិទ Bluetooth GPS WiFi NFC និង Sensor មួយចំនួនទៀត នៅពេលមិនត្រូវការប្រើ។
១៥.បិទរំញ័ររបស់ទូរសព្ទ ប្រសិនបើអ្នកមិនចាំបាច់ប្រើ។
១៦.អ្នកគួរប្រើ Power Saving Mode ដើម្បីសន្សំសំចៃការប្រើប្រាស់ថាមពលថ្ម។
១៧. *រឿងដែលសំខាន់ជាងគេ គឺអ្នកគួរប្រើថ្ម Original ដែលមានគុណភាព ចៀសវាងការទិញថ្មដែលមានតម្លៃថោកហើយគ្មានគុណភាព ព្រោះវាមិនត្រឹមតែជាបញ្ហាអាយុកាលប្រើប្រាស់របស់ថ្មនោះទេ តែវាជាបញ្ហាសុវត្ថិភាពផងដែរ។ ថ្មដែលគ្មានគុណភាព អាចបណ្ដាលឲ្យគ្រោះថ្នាក់ដោយសារ ការផ្ទុះឆេះ ដូចករណីដែលឃើញមានលើបណ្ដាញផ្សព្វផ្សាយជាច្រើនរួចមកហើយ។
=====================================
វិធីសាស្ត្រ ៨ យ៉ាងធ្វើឲ្យថ្មទូរសព្ទ iOS ( iphone...) ប្រើបានយូរ ៖
១.អ្នកមិនចាំបាច់បិទកម្មវិធីណាមួយឡើយ ព្រោះការបិទ បើក កម្មវិធីដដែលៗ និងជារឿយៗក៏ធ្វើឲ្យស៊ីថ្មដែរ។ បើសិនអ្នកមិនប្រើកម្មវិធីណាមួយទេ ម៉ាស៊ីនក៏មិនដំណើរការកម្មវិធីនោះដែរ ដូច្នេះអ្នកមិនចាំបាច់បារម្ភអំពីកម្មវិធីដែលមិនបានប្រើនោះឡើយ លើកលែងតែ ការថតសំឡេង ការចាក់ចម្រៀង និងការដាក់ Location Service ។
២.កុំទុក iphone របស់អ្នកសាកចោលនៅពេលវាពេញ ១០០% ហើយ ព្រោះវានាំឲ្យថ្មឡើងកម្ដៅលើសពីធម្មតា បើទុកចោលកាន់តែយូរគឺអាចនឹងធ្វើឲ្យថ្មឆាប់ខូច។
៣.អ្នកមិនចាំបាច់សាកថ្មរហូតដល់ ១០០% គ្រប់ពេលវេលានោះទេ ជាទូទៅគួរសាកឲ្យបានត្រឹម ៨០% និងប្រើឲ្យអស់ត្រឹម ៤០% ហើយសាកទៀតទើបជួយទ្រទ្រង់អាយុថ្មបានយូរអង្វែង។
៤.នៅពេលសាកថ្ម បើអ្នកបើក Airplane Mode នោះវានឹងសាកឆាប់ពេញ។
៥.កុំប្រើ iphone រហូតដល់ ០% រៀងរាល់ពេល ព្រោះថ្មអាចងាយខូចដែរ បើសាកវាញឹកញាប់ពេក គួរប្រើឲ្យអស់ថ្មម្ដងក្នុងមួយខែ ដោយសារវាជួយឲ្យថ្មរបស់អ្នកមានដំណើរការល្អឡើងវិញ។
៦.កុំឧស្សាហ៍ ទាញសារចូលទូរសព្ទញឹកញាប់ពេក ព្រោះវាស៊ីថ្មលឿនដែលពេលណាមានការបញ្ជូនទិន្នន័យម្ដងៗ។
៧.កុំទុកសាកថ្មចោល បើសិនថ្មទូរសព្ទឈប់សាកហើយ ព្រោះឲ្យតែដោតចោល គឺវាត្រូវប្រើប្រាស់ថាមពលអគ្គិសនីហើយ។
៨.បន្ថយភាពភ្លឺរបស់ទូរសព្ទមកត្រឹម ៥០% បានហើយ ធ្វើដូចនេះអាចឲ្យអ្នកប្រើបានយូរជាងធម្មតាពីរម៉ោង។
" ខ្ញុំជឿជាក់ថាថាមពលថ្មរបស់អ្នកនឹងប្រើបានយូរជាងមុន បន្ទាប់ពីអ្នកបានអនុវត្តតាមការណែនាំខាងលើ " ៕
====================
ចម្លង និងកែសម្រួលបន្ថែមពី ៖
No comments:
Post a Comment