តើអ្វីទៅជាជំនាញនិយាយជាសាធារណៈ?
រូបតំណាង |
ជំនាញនិយាយជាសាធារណៈដែលភាសាអង់គ្លេសហៅថា
Public Speaking Skills
គឺជាសមត្ថភាពមួយក្នុងការបង្ហាញគំនិតឬអ្វីមួយដែលអ្នកចង់បង្ហាញទៅកាន់ក្រុមមនុស្សឬក៍អតិថិជនរបស់អ្នក។
ជំនាញនេះគឺមានសារៈសំខាន់ណាស់ចំពោះអ្នកដែលធ្វើការក្នុងវិស័យផ្សេងៗគ្នាដូចជាក្នុងវិស័យជំនួញ
នយោបាយ ក្រុមហ៊ុនសហគ្រាស។ល។ដែលតំរូវឲ្យអ្នកធ្វើការនិយាយជាចាំបាច់។
សំរាប់អ្នកជំនាញ (Professionals)
ជំនាញនិយាយជាសាធារណៈអាចជួយឲ្យពួកគេអាចបង្ហាញពីគំនិតរបស់ពួកគេបានយ៉ាងល្អទៅកាន់ទស្សនិកជនដែលជាទូទៅមានចំនួនច្រើន។
យ៉ាងណាមិញសារៈសំខាន់របស់ជំនាញនិយាយជាសាធារណៈសំរាប់សិស្សានុសិស្សក៏មិនគួរមើលរំលងផងដែរ។
ជាការពិតណាស់ជំនាញនេះអាចជួយឲ្យអ្នកយកឈ្នះទំនុកចិត្តរបស់អ្នកដទៃដែលជាចុងក្រោយអាចជួយឲ្យអ្នកឬក្រុមហ៊ុនរបស់អ្នកទទួលបានផលប្រយោជន៍។ជំនាញនិយាយជាសាធារណៈនេះ
បាននឹងកំពុងដើរតួនាទីយ៉ាងសំខាន់ក្នុងភាពជោគជ័យរបស់បុគ្គលដ៏មានឥទ្ធិពលនានានៅជុំវិញពិភពលោក។
ប៉ុន្តែទោះបីជាយ៉ាងណាក៏ដោយក៏មានមនុស្សមួយចំនួនធំហាក់ដូចជាមិនទាន់ដឹងពីវិធីសាស្រ្តដើម្បីជួយឲ្យពួកគេអាចបង្កើននូវជំនាញនេះបាននៅឡើយទេ។
បើតាមការស្រាវជ្រាវបានរកឃើញថាមានមនុស្សមិនតិចទេដែលមានអារម្មណ៍ភ័យខ្លាចនៅពេលដែលតំរូវឲ្យពួកគេនិយាយឬក៏ធ្វើបទបង្ហាញជាសាធារណៈ។
វិធីសាស្រ្តដើម្បីធ្វើឲ្យជំនាញនិយាយជាសាធារណៈរបស់អ្នកមានភាពប្រសើរឡើងដែលនឹងលើកយកមកបកស្រាយក្នុងអត្ថបទនេះនឹងជួយតម្រង់ទិសឲ្យអ្នកដើរលើផ្លូវមួយដែលអាចជួយឲ្យអ្នកសំរេចនូវក្តីសុបិន្តមួយដើម្បីឲ្យក្លាយជាបុគ្គលម្នាក់លែងខ្លាចក្នុងការនិយាយជាសាធារណៈ។
ខាងក្រោមនេះគឺជាគន្លឹះមួយចំនួនក្នុងការនិយាយជាសាធារណៈដែលខ្ញុំបាទបានសិក្សា
ក៏ដូចជាអនុវត្តដោយផ្ទាល់ក្នុងការនិយាយជាសាធារណៈនាពេលកន្លងមក។
សង្ឃឹមថាប្រិយមិត្តអ្នកអានទាំងអស់នឹងទទួលបានចំណេះដឹងទាក់ទងនឹងជំនាញនេះ
ហើយបើសិនជាមានភាពខ្វះខាតឬលើសលោះដោយប្រការណាមួយមិនសមរម្យនោះ
សូមមេត្តាអធ្យាស្រ័យដោយអនុគ្រោះផងចុះ
ដោយថាបទពិសោធន៍នៅក្មេងខ្ចីតែអាស្រ័យដោយហេតុចង់ចែករំលែកចំណេះដឹងដែលមានបន្តិចបន្តួច
មិនចង់ទុកឲ្យកប់ចាល ចែកជូនដល់បងប្អូនអ្នកសិក្សាទាំងអស់គ្នា។
គន្លឹះក្នុងការបង្កើនសមត្ថភាពនិយាយជាសាធារណៈ
សង្កេតមើលពីរបៀបនិយាយរបស់បុគ្គលដែលពូកែធ្វើបទបង្ហាញ
បើតាមប្រសាសន៍របស់លោក សូអ៊ីជីរ៉ូ ហុងដា ដែលជាស្ថាបនិករបស់ក្រុមហ៊ុនហុងដាដ៏ល្បីឈ្មោះរបស់ប្រទេសជប៉ុន
មនុស្សដែលជោគជ័យភាគច្រើនជាមនុស្សដែលចេះសិក្សារៀនសូត្រពីអ្នកដែលនៅជុំវិញខ្លួន
ហើយប្រើប្រាស់នូវអ្វីដែលគេបានរៀននោះដើម្បីអភិវឌ្ឍខ្លួនឯងឲ្យជោគជ័យ។ជាការពិតណាស់
មនុស្សម្នាក់អាចសិក្សាបានច្រើនណាស់បើសិនជាគេនោះមានជំនាញក្នុងការសង្កេត
(Good Observation Skills)។
អាចនឹងមានមនុស្សជាច្រើនណាស់នៅជុំវិញខ្លួនអ្នកដែលបានយល់ដឹង
ឬក៏មានសិល្បៈក្នងការនិយាយជាសាធារណៈរួចទៅហើយ
ដូច្នេះអ្នកគួរតែសង្កេតមើលថាតើពួកគេនិយាយឬមួយធ្វើដូចម្តេចនៅចំពោះមុខសាធារណៈជនទើបឥរិយាបទរបស់ពួកគេមើលទៅប្រកបដោយភាពមានទំនុកចិត្តលើខ្លួនឯង។
បើសិនជាមានឱកាស អ្នកគប្បីចូលទៅនិយាយលេងសំនេះសំណាលជាមួយពួកគេ
ហើយសុំជាយោបល់របស់ពួកគេថាធ្វើយ៉ាងម៉េចទើបអាចមានជំនឿជាក់លើខ្លួនឯងមានសុទិដ្ឋិនិយមឬក៏មានជោគជ័យក្នុងជីវិតជាដើម។រៀនពីចម្លើយនិងដំបូន្មានរបស់ពួកគេដើម្បីភាពជោគជ័យរបស់អ្នក។
បង្កើនសមត្ថភាពភាសារបស់អ្នកឲ្យមានភាពល្អប្រសើរ
*ភាសាសំដៅទៅលើភាសាដែលអ្នកលើកមកនិយាយ។
បើអ្នកនិយាយជាភាសាជាតិអ្នកត្រូវស្ទាត់ជំនាញភាសាជាតិរបស់អ្នក
តែបើអ្នកនិយាយជាភាសាបរទេស អ្នកត្រូវពង្រឹងភាសាបរទេសនោះឲ្យបានស្ទាត់ជំនាញ។
ដំបូន្មានដ៏ល្អប្រសើរមួយដើម្បីអភិវឌ្ឍជំនាញនិយាយជាសាធារណៈរបស់អ្នកគឺថាធ្វើយ៉ាងណាត្រូវបង្កើនសមត្ថភាពភាសារបស់អ្នកជាមុនសិន។
បើសិនជាអ្នកមិននិយាយភាសាបានល្អឬស្ទាត់ជំនាញទេ
អ្នកប្រហែលជាមិនអាចទាក់ទាញចំណាប់អារម្មណ៍ពីអ្នកដែលកំពុងតែស្តាប់អ្នកនោះទេ
ដូចេ្នះហើយសមត្ថភាពប្រើប្រាស់ភាសាគឺមានសារៈសំខាន់ណាស់ក្នុងការជួយឲ្យអ្នកទទួលបានជោគជ័យ។
ប៉ុន្តែអ្នកគួរចងចាំថាការរៀនភាសាគេមិនមែនងាយស្រួលនោះទេ វាទាមទារពេលវេលា
និងការព្យាយាមប្រឹងប្រែង
និយាយរួមគ្មាននរណាម្នាក់អាចរៀនចេះភ្លាមៗក្នុងរយៈពេលមួយពព្រិចភ្នែកបាននោះទេ
អញ្ចឹងហើយបើសិនជាអាច ចូរអ្នកធ្វើការអនុវត្តឲ្យបានច្រើន
ដូចដែលប្រយោគមួយរបស់ភាសាអង់គ្លេសនិយាយថា “Practice makes perfect”
ឬក៏ការអនុវត្តជួយឲ្យមានភាពល្អប្រសើរ។
បង្កើនទំនុកចិត្តលើខ្លួនឯង
វាជារឿងធម្មតាទេដែលថា
នៅពេលណាអ្នកមានជំនឿជាក់លើខ្លួនឯងហើយនោះ អ្នកប្រាកដជាមានកំលាំងចិត្ត
និងភាពក្លាហានក្នុងការបញ្ចេញសមត្ថភាពរបស់អ្នកបានយ៉ាងល្អ។ ផ្ទុយទៅវិញ
បើសិនជាអ្នកនៅមានភាពស្រពេចស្រពិល ឬក៏មិនមានទំនុកចិត្តលើខ្លួនឯងទេនោះ
បើទោះបីជាអ្នកមានចំនេះដឹង ឬបានរៀបចំខ្លួនទុកជាមុនយ៉ាងណាក៏ដោយ
អ្នកនឹងមិនអាចបង្ហាញឲ្យអស់ពីសមត្ថភាពរបស់អ្នកបានដែរ។ អាស្រ័យហេតុនេះ
អ្នកគួរតែមានសុទិដ្ឋិនិយមលើសមត្ថភាពរបស់ខ្លួនឯង និងផ្តោតអារម្មណ៍លើអ្វីដែលអ្នកត្រូវនិយាយវិញដើម្បីរកវិធីសាស្រ្តយ៉ាងណាធ្វើឲ្យការនិយាយរបស់អ្នកទទួលបានចំណាប់អារម្មណ៍ពីទស្សនិកជន
ជាជាងគិតថាតើពួកគេនឹងមានប្រតិកម្មយ៉ាងណាចំពោះអ្វីដែលអ្នកត្រូវនិយាយ។
រៀបចំខ្លួនឲ្យបានរួចរាល់សំរាប់ការនិយាយរបស់អ្នក
មានឃ្លាមួយសរសេរថា
“បើអ្នកបរាជ័យក្នុងការត្រៀមខ្លួនទុកជាមុន
គឺស្មើនឹងត្រៀមខ្លួនទុកជាមុនក្នុងការបរាជ័យ”។ មិនខុសគ្នានោះទេ
ក្នុងការនិយាយជាសាធារណៈការរៀបចំខ្លួនទុកជាមុនមានសារៈសំខាន់មែនទែន
ព្រោះទោះបីជាអ្នកជាមនុស្សមានទំនុកចិត្តលើខ្លួនឯងក៏ដោយ
តែបើមិនដឹងថាអ្នកត្រូវនិយាយពីអ្វីនោះទេ
អ្នកប្រាកដគឺជាមិនអាចធ្វើបានល្អនោះទេ។
ដូច្នេះហើយអ្នកត្រូវតែធ្វើការសិក្សាស្រាវជ្រាវទៅលើប្រធានបទដែលត្រូវលើកមកនិយាយ
និងព្យាយាមឈ្វេងយល់ឲ្យបានច្បាស់ជាមុន ជៀសវាងនិយាយមិនដឹងក្បាលមិនដឹងកន្ទុយ
ដែលមិនត្រឹមតែធ្វើឲ្យអ្នកសា្តប់មិនយល់
ថែមទាំងធុញទ្រាន់នឹងអ្វីដែលអ្នកកំពុងនិយាយទៀតផង។ មួយវិញទៀត
បើសិនជាអ្នកលើកយកព័ត៌មានមិនពិត ឬក៏មិនត្រឹមត្រូវមកនិយាយ
វាអាចនឹងធ្វើឲ្យទស្សនិកជនបាត់បង់ជំនឿជាក់មកលើអ្នក។
ហើយត្រូវចង់ចាំថាគ្មានអ្វីអាក្រក់ជាងនេះទៀតទេ។
ជាសរុបមកបើអ្នកចង់សំរេចបានអ្វីមួយអ្នកត្រូវខិតខំប្រឹងប្រែង
ព្រោះថាបទពិសោធន៍ល្អៗមិនមែនកើតចេញពីការខិតខំប្រឹងប្រែងមួយពព្រិចភ្នែកនោះទេ។
សង្ឃឹមថាអ្នកទាំងអស់គ្នាបានទទួលនូវចំណេះដឹងល្អៗមួយចំនួនបន្ទាប់ពីបានអានអត្ថបទមួយនេះចប់។
No comments:
Post a Comment