១. រូបសម្បត្តិ
បុរសមានរូបសម្បត្តិស្អាតបាត គឺមានន័យថា មានសុខភាពល្អ មានអនាម័យក្នុងខ្លួន និងការរស់នៅ។ បុរសត្រូវចេះស្លៀកពាក់ និងតុបតែងកាយ ទៅតាម ឋានៈ ទីកន្លែង ពេលវេលា និងកាលៈទេសៈ។ បើស្អាតតែរូប គ្មានអនាម័យក្នុងខ្លួន និងក្នុងការរស់នៅទេ គ្មាននារីៗណាមកបេតីឡើយ។
២. វិជ្ជាសម្បត្តិ
បុរសត្រូវមានការសិក្សាជ្រៅជ្រះ និងចេះដឹងច្រើន ទាំងផ្នែកសង្គម និងជីវិត។ បុរសក៏ត្រូវចេះជំនាញផ្សេងៗទៀតដែលពាក់ព័ន្ធនឹងការរស់នៅ និងជីវិតផងដែរ។
៣. ចរិយាសម្បត្តិ
បុរសត្រូវមានសីលធម៌ សុជីវធម៌ ដឹងខុសដឹងត្រូវ ស្គាល់បុណ្យ ស្គាល់បាប និងចេះគោរពច្បាប់ទម្លាប់ប្រពៃណីទំនៀមទម្លាប់របស់សង្គម។ បើចរិយាសម្បត្តិមិនល្អទេ កោងកាច កាប់ចាក់ ប្រព្រឹត្តអំពើល្មើសច្បាប់សង្គម ទោះជាមានរូបរាងស្អាតប៉ុណ្ណា ក៏គ្មានអ្នកណារាប់រកដែរ កុំថាឡើយដល់ស្រលាញ់នោះ។
៤. ប្រាជ្ញាសម្បត្តិ
បុរសត្រូវតែមានទាំងចំណេះដឹង និងប្រាជ្ញាវាងវៃផងដែរ។ អ្នកខ្លះចេះតែរៀនមួយមុខគត់ មិនចេះគិតមុខក្រោយ គ្មានប្រាជ្ញា ធ្វើអ្វីៗមិនចេះបត់បែនតាមកាលៈទេសៈ និងពេលវេលាឡើយ។ ប្រាជ្ញាឆ្លាតវៃជារឿងសំខាន់ណាស់របស់មនុស្ស។ រៀនចេះហើយ បើមិនវាងវៃទេ គឺមិនមានភាពជោគជ័យឡើយ។
៥. គុណសម្បត្តិ
បុរសត្រូវមានគុណសម្បត្តិផងដែរ ដូចជាបានធ្វើល្អដល់សហគមន៍ ដល់សង្គម និងមនុស្សទូទៅ។ មានឈ្មោះល្អក្នុងសហគមន៍ និងក្នុងសង្គម ដូចជានិស្សិតពូកែ រាជការឆ្នើម អ្នកនិពន្ធល្បីល្បាញ តារាល្បីឈ្មោះ អ្នកជំនួញមានមុខមាត់…។ កិត្តិនាម និងកិត្តិយសនេះហើយដែលជាកត្តា ទាក់ទាញដ៏ធំបំផុតរបស់បុរស។
៦. ទ្រព្យសម្បត្តិ
បុរសដែលមានទ្រព្យសម្បត្តិ ដោយសុចរិត ក៏ជាកម្លាំងទាក់ទាញដ៏សំខាន់ផងដែរ។ ទ្រព្យសម្បត្តិក៏អាចជួយឲ្យស្នេហា និងជីវិតរុងរឿងផងដែរ។ ប៉ុន្តែបើមានទ្រព្យសម្បត្តិក្នុងផ្លូវអាក្រក់ ក៏គ្មានមនុស្សត្រឹមត្រូវណាបេតីដែរ។
៧. ឋានៈតួនាទី
ឋានៈ តួនាទីធំដុំ និងខ្ពង់ខ្ពស់នៅក្នុងរាជការ ក្នុងសហគមន៍ ក្នុងជំនួញ និងក្នុងការងារផ្សេងៗទៀត ក៏ជាភាពទាក់ទាញដ៏ពិសេសរបស់បុរសផងដែរ។
៨. សេចក្ដីស្មោះត្រង់
ភាពស្មោះត្រង់ និងភក្ដីភាពរបស់បុរស ក៏ដើរតួនាទីដ៏សំខាន់ ក្នុងការទាក់ទាញបេះដូងរបស់នារីដ៏មានប្រសិទ្ធភាពផងដែរ។ នារីភាគច្រើនចង់បានភក្ដីភាពរបស់បុរសជាងទ្រព្យសម្បត្តិ។ បើមានតែទ្រព្យសម្បត្តិ ហើយមានស្រីញីហូរហែរ ក៏គ្មាននារីត្រឹមត្រូវណាបេតីដែរ។ មានតែនារីមិនស្មោះត្រង់ប៉ុណ្ណោះដែលចង់បានលុយជាងភក្ដីភាព។
៩. ភាពគួរឲ្យស្រលាញ់
ធាតុផ្សំចុងក្រោយនេះ ក៏សំខាន់មិនតិចដែរ។ បើខ្វះធាតុផ្សំចុងក្រោយនេះ ក៏កម្លាំងទាក់ទាញរបស់បុរសត្រូវចុះខ្សោយដែរ។ នារីខ្លះនិយាយថា បុរសនោះស្អាតមែនហើយ តែគ្មានភាពគួរឲ្យស្រលាញ់សោះ។ យើងអាចសង្កេតឃើញហើយថា បុរសខ្លះស្អាតជាងគេ តែសោះកក្រោះខាងផ្នែកមនោសញ្ចេតនា និងកាយវិការបែរជាចាញ់បុរសម្នាក់ទៀតដែលមិនសូវស្អាត តែសំបូរទៅដោយមន្តស្នេហ៍ និងមនោសញ្ចេតនាដែលអាចឆាបឆក់បេះដូងនារីយ៉ាងខ្លាំងបំផុត។
១០. ដោះស្រាយបញ្ហាដោយសន្តិវិធី និងមានហេតុផល
បុរសណាដែលប្រកាន់យកសន្តិវិធី និងហេតុផលក្នុងការដោះស្រាយបញ្ហា គឺជាមនុស្សដែលនារីស្រលាញ់ចូលចិត្តបំផុត។ បុរសណាដែលចូលចិត្តដោះស្រាយបញ្ហានានា ទាំងជាមួយនាង និងអ្នកដទៃ ដោយប្រើហិង្សា និងគ្មានហេតុផល គឺជាមនុស្សដែលនាងស្អប់បំផុត៕
Credit: Sabay
No comments:
Post a Comment